Mapeo: តាមដាន និងកត់ត្រាពិភពលោកជុំវិញអ្នក។

អ្វីទៅជា ម៉ាពីអូ (Mapeo)?

ម៉ាពីអូ (Mapeo) ត្រូវបានបង្កើតឡើងសម្រាប់អ្នកការពារផែនដី ដើម្បី​ងាយស្រួល​ចងក្រង​ព័ត៌មាន​អំពី​បញ្ហា​សិទ្ធិមនុស្ស​និង​បរិស្ថាន និង​ដើម្បី​ប្រមូល​ទិន្នន័យអំពីដីធ្លីរបស់ពួកគេ។

វាអាចប្រើបានដោយបុគ្គលតែម្នាក់ ឬមួយក្រុម ដែលមានបំណងសហការគ្នានិងចែករំលែកព័ត៌មាន ហើយជាពិសេស​សម្រាប់​តំបន់​ដាច់ស្រយាល​និង​មិនមានសេវាអ៊ីនធឺនែត។ វាសាមញ្ញ ស្រួលប្រើ និងមិនចំណាយថវិកា ហើយអាច​កែប្រែមុខងារនានាតាមតម្រូវការរបស់សហគមន៍ និងអាច​បកប្រែជាភាសាក្នុងស្រុកបានទៀតផង។

កម្មវិធី Mapeo Mobile App ដែលសម្រាប់ប្រើប្រាស់​ប្រមូល​ភ័ស្តុតាង​នៅ​សហគមន៍​ឬតាម​មូលដ្ឋាន ដើម្បីថតរូបភាព ឬដើម្បីកត់ត្រាទីតាំងដោយប្រើ GPS។ ចំណែកកម្មវិធី Mapeo Desktop app សម្រាប់ ប្រើដើម្បី​រៀបចំ​ចាត់ចែង​ទិន្នន័យ​ដែលប្រមូលបាន​តាមរយៈ​ទូរស័ព្ទដៃ​ឬម៉ាស៊ីន GPS និង​សម្រាប់មើលរូបភាព កែសម្រួល និងបង្កើតជារបាយការណ៍ ដែល​សកម្មភាព​ទាំងនេះ​លំបាក​នឹង​ធ្វើ​នៅលើ​ទូរស័ព្ទដៃ។ ឧបករណ៍ទាំងពីរអាចប្រើរួមគ្នាសម្រាប់គម្រោងជាបុគ្គលឬជាក្រុម ព្រោះអ្នកអាចផ្ទេរ​ទិន្នន័យ​រវាង​ទូរស័ព្ទដៃ​និង​ទូរស័ព្ទដៃ រវាង​ទូរស័ព្ទដៃ​និង​កុំព្យូទ័រ និង​រវាង​កុំព្យូទ័រ​និង​កុំព្យូទ័រ។

ឧបករណ៍ ម៉ាពីអូ ត្រូវបាន​បង្កើតឡើង​ក្រោមកិច្ច​សហការ​ជាមួយនឹង​សហគមន៍​ជនជាតិដើម​ភាគតិច​ដែល​ប្រឈម​នឹងការ​គម្រាមកំហែង​ចំពោះ​ដីធ្លី​របស់ពួកគាត់ ដូចជា ការធ្វើអាជីវកម្មរ៉ែមាសខុសច្បាប់ ការបំពុល​ដោយសារ​អណ្តូងប្រេង និង​ការប្រមាញ់​ខុសច្បាប់។ ឧបករណ៍នេះត្រូវបានបង្កើតឡើងដើម្បីជួយសហគមន៍ ចងក្រង​ឯកសារ​អំពីសកម្មភាពខុសច្បាប់​ទាំងអស់នេះ​ដើម្បីធ្វើសកម្មភាពប្រឆាំង ដូចជា រាយការណ៍ទៅអាជ្ញាធរ ដាក់ពាក្យបណ្តឹង បង្កើតយុទ្ធនាការតវ៉ា ឬបង្កើត​ផែនទី​ដើម្បី​ទាមទារ​យក​ដី​មកវិញ។

ឧបករណ៍ Mapeo គឺជាកម្មវិធីចំហ (open source) ដែល ទទួលបានផល​ពីមតិយោបល់​របស់​អ្នកប្រើប្រាស់​នៅ​ទូទាំង​សកលលោក។ លោកអ្នកអាចផ្តល់មតិឬសំណើសម្រាប់ការបង្កើតមុខងារបន្ទាប់សម្រាប់ឧបករណ៍ ម៉ាពីអូ។

មូលហេតុដែលអ្នកគួរប្រើឧបករណ៍ ម៉ាពីអូ

មានឧបករណ៍និងកម្មវិធីជាច្រើនដែលអ្នកអាចប្រើដើម្បីបង្កើតផែនទីឬកត់ត្រាព័ត៌មាន។ ក៏ប៉ុន្តែ បន្ទាប់ពីបាន​ធ្វើការងារ​ជាមួយ​អ្នកការពារ​ផែនដី​អស់ពេល​ជាច្រើនឆ្នាំមក ក្រុមការងារ Digital Democracy រកមិនឃើញ​ឧបករណ៍​ណាមួយ​ដែល​ឆ្លើយតប​ទៅនឹង​តម្រូវការ​របស់​អ្នកការពារ​ផែនដី​នៅ​ជួរមុខ​នោះទេ ដូច្នេះហើយ យើងក៏​សម្រេចចិត្ត​បង្កើត​ឧបករណ៍មួយ​ ដោយ​សហការ​ជិតស្និទ្ធ​ជាមួយ​ដៃគូក្នុងស្រុករបស់យើង។

ជារឿយៗ ឧបករណ៍ជាច្រើនត្រូវការសេវាអ៊ីនធឺនែត ហើយនៅ​តំបន់​ងាយរងគ្រោះ​និង​ដាច់ស្រយាល​ពុំមាន​សេវា​អ៊ីនធឺនែតទេ។ ឧបករណ៍ទាំងនោះ ពឹងផ្អែកលើប្រព័ន្ធផ្ទុកព័ត៌មាន (server) កណ្តាល ​ឬអនឡាញ របស់​ក្រុមហ៊ុន​សាជីវកម្ម ដែលទាញ​យក​ទិន្នន័យ​ពីដៃ​របស់អ្នក។ ការណ៍នេះ​បង្ករ​ភាព​ស្មុគ្រស្មាញ​​ដែល​​ពុំគួរ​​កើតមាន បណ្តាល​ឲ្យសហគមន៍​ដែល​ពុំសូវ​មាន​បទពិសោធន៍​ផ្នែកកុំព្យូទ័រ បាត់បង់ស្វ័យភាព​របស់ខ្លួន បាត់បង់​សិទ្ធិអំណាច​លើ​ព័ត៌មាន​របស់ខ្លួន ជួនកាល​ត្រូវ​ពឹងផ្អែក​លើ​អ្នកជំនាញ​ពីខាងក្រៅ ឬត្រូវ​បង់ថ្លៃ​ទិញ​កម្មវិធី​ដែល​មាន​តម្លៃខ្ពស់។

ឧបករណ៍ ម៉ាពីអូ ត្រូវបានបង្កើតឡើងដើម្បីដោះស្រាយបញ្ហាទាំងអស់នេះ។

1. សាមញ្ញ ងាយប្រើ និងរៀនឆាប់ចេះ ឧបករណ៍ Mapeo Mobile ត្រូវបាន​បង្កើតឡើង​សម្រាប់រៀន​ដោយងាយ ទោះបីជា​អ្នក​មិនធ្លាប់​ប្រើទូរស័ព្ទដៃ​ទំនើប​ពីមុន​ក៏ដោយ។ វាប្រើនិមិត្តសញ្ញាច្រើន ដើម្បីងាយស្រួលមើលនិងងាយស្រួលយល់។ ឧបករណ៍ Mapeo Desktop តម្រូវឲ្យអ្នកប្រើមានចំណេះដឹងកុំព្យូទ័រខ្លះៗ ក៏ប៉ុន្តែវាមាន​ interface សាមញ្ញ និង មិនមាន feature ច្រើនប៉ុន្មានទេ។ ប្រសិនបើមានតម្រូវការវិភាគឬធ្វើផែនទីដែលស្មុគ្រស្មាញ អ្នកអាចផ្ទេរទិន្នន័យពី ម៉ាពីអូ ទៅ​ឧបករណ៍​ដទៃទៀត​បាន។ ភាពសាមញ្ញនេះជួយសហគមន៍ជាច្រើនឲ្យប្រើប្រាស់ឧបករណ៍នេះ និងធ្វើជាម្ចាស់លើគម្រោង​របស់​ខ្លួនឯង។

2. ម៉ាពីអូ ដំណើរការដោយមិនត្រូវការ អ៊ីនធឺនែតៈ Mapeo Mobile ចែករំលែក​ព័ត៌មាន​តាមរយៈ​បណ្តាញ ​WiFi រវាងឧបករណ៍តែប៉ុណ្ណោះ។ ការងារនេះអាចត្រូវការអ៊ិនធឺនែត ប៉ុន្តែក៏អាច​ប្រើបាន​ដោយ​ពុំចាំបាច់មាន​អ៊ីនធឺនែត​ដែរ​គឺការប្រើ​ឧបករណ៍​បញ្ជូនសេវា វ៉ាយហ្វាយ (router) ដ៏សាមញ្ញ​ដែលអាច​ដំណើរការ​ជាមួយ​នឹង​កុំព្យូទ័រ និង​អាគុយតូចមួយ​សម្រាប់​ផ្តល់ថាមពលភ្លើង។ ឧបករណ៍ Mapeo Desktop អាចចែករំលែកទិន្នន័យតាមវិធីដូចគ្នានេះ ហើយក៏អាច​បញ្ជូន​ទិន្នន័យ​ចេញ​តាម ហ្វាល​ឯកសារ (files) ដែលអាចចម្លងតាមឧបករណ៍ផ្ទុកទិន្នន័យ (USB sticks)។

3. ឧបករណ៍ ម៉ាពីអូ ប្រើប្រព័ន្ធចែករំលែក ដេតាបេស (peer-to-peer database) ដោយពុំ​ចាំបាច់​ឆ្លងកាត់​បណ្តាញ​កុំព្យូទ័រមេ (centralized server) នោះទេ។ នេះមានន័យថា សមាជិកក្រុមអាច​តភ្ជាប់​​និង​​ចែករំលែក​ទិន្នន័យ ដោយពុំចាំបាច់មានប្រភពទិន្នន័យមេ។ ផ្ទុយទៅវិញ សមាជិកដែលបានធ្វើ synchronize ជាមួយគ្នា អាចទទួលទិន្នន័យ​នៅលើ​ឧបករណ៍​ទូរស័ព្ទដៃ​របស់​ពួកគេ។ វាចល័តជុំវិញបណ្តាញនៃគម្រោង។ អត្ថប្រយោជន៍របស់វាគឺ រាល់ទិន្នន័យដែលអ្នកប្រមូលបាននៅលើឧបករណ៍ Mapeo Mobile ស្ថិតនៅក្នុង ទូរស័ព្ទដៃ​របស់អ្នក ហើយអ្នក​ក៏អាច​មើលឃើញ​ទិន្នន័យ​ដែល​ប្រមូលបាន​ដោយ​សមាជិក​ដទៃទៀត​នៅក្នុង​ក្រុម​របស់​អ្នក​ដែរ។ វាពុំមានរចនាសម្ព័ន្ធរញ៉េរញ៉ៃ ហើយវាប្រសើរជាងការផ្ទុកទិន្នន័យនៅលើបណ្តាញកុំព្យូទ័រមេ ឬអនឡាញ (server or online) មានន័យថា សហគមន៍​របស់អ្នក​រក្សាបាន​ភាព​ជាម្ចាស់​ និងអាច​គ្រប់គ្រង​ទិន្នន័យ​របស់​ខ្លួន​ដោយខ្លួនឯង។

4. អាចកែសម្រួលដើម្បីបំពេញតម្រូវការរបស់សហគមន៍ៈ សហគមន៍អាចកែសម្រួល ផ្នែកខ្លះ​នៃ​ឧបករណ៍ ម៉ាពីអូ ដើម្បីឆ្លើយតបទៅនឹងតម្រូវការរបស់ខ្លួនឯង ដូចជា ភាសា ផែនទី និង ព័ត៌មាន​ដែល​ប្រមូលបាន។ នៅពេលដែលអ្នកទាញយកកម្មវិធី ម៉ាពីអូ វាមកជាមួយនឹងផែនទីពិភពលោកដែលតម្លើងដោយ​ស្វ័យប្រវត្តិ​ហើយ​អ្នកអាច​ប្រើបាន​ភ្លាមៗ​ដើម្បី​ប្រមូល​ព័ត៌មាន​អំពី​ការគម្រាម​កំហែង​ចំពោះ​សិទ្ធិ​ឬ​ចំពោះដីធ្លី។ ឧបករណ៍ ម៉ាពីអូ ត្រូវបានបកប្រែជាភាសាមួយចំនួនរួចហើយ (រួមមាន ភាសាអង់គ្លេស ព័រទុយហ្គាល់ ថៃ ខ្មែរ និងភាសាជាច្រើនទៀត) ហើយអាចបកប្រែជាភាសាផ្សេងៗទៀតបានដែរ។

អ្នកអាចកែសម្រួលឧបករណ៍ ម៉ាពីអូ តាមវិធីដូចខាងក្រោម៖

• បកប្រែកម្មវិធីទៅជាភាសាក្នុងស្រុករបស់ខ្លួន ដោយការប្រើឧបករណ៍ដែលមានឈ្មោះថា Crowdin។
• បង្កើតបញ្ជីមួយ អំពីវត្ថុដែលអ្នកចង់ប្រមូលព័ត៌មានអំពីវា ហើយរៀបចំសំណួរពាក់ព័ន្ធ និង​បង្កើត​និម្មិត្តសញ្ញា​សម្រាប់សម្គាល់វត្ថុទាំងនោះ។
• រចនាផែនទី offline របស់អ្នក ដោយបញ្ចូលព័ត៌មានដែលត្រឹមត្រូវដើម្បីគាំទ្រដល់ឯកសាររបស់អ្នក។ ឧទាហរណ៍ អ្នកចង់បានផែនទីផ្កាយរណបលម្អិតមួយ ឬក៏ផែនទីមួយដែលបង្ហាញ​ព្រំប្រទល់​រវាង​ទីតាំង​អាជីវកម្មរ៉ែ​និង​ដីដែល​មាន​ប្លង់​កម្មសិទ្ធិ ឬផែនទីមួយ​ដែលមាន​ទិន្នន័យ​អំពី​រយៈកម្ពស់​ដើម្បី​ជួយអ្នក​រៀបចំ​ផែនការ​សម្រាប់ការ​ធ្វើដំណើរ​ចុះភូមិឬវាល។

វិធីប្រើឧបករណ៍ ម៉ាពីអូ

ឧបករណ៍ ម៉ាពីអូ អាចត្រូវបានប្រើក្នុងសណ្ឋានផ្សេងៗគ្នា ដើម្បីការពារដីធ្លីនិងសិទ្ធិរបស់អ្នក។ នេះគឺជាឧទាហរណ៍មួយ អំពីរបៀបប្រើឧបករណ៍ ម៉ាពីអូ ក្នុងការ​ប្រមូល​ភ័ស្តុតាង​អំពី​ការរំលោភ​បំពាន​សិទ្ធិ ដើម្បីឲ្យអ្នកយល់អំពីដំណើរការរបស់ឧបករណ៍នេះ ។

1. ទាញយកនិងតម្លើងកម្មវិធី ម៉ាពីអូ។ អ្នកអាចប្រើកម្មវិធី ម៉ាពីអូ ភ្លាមៗ ជាមួយនឹងមុខងារស្វ័យប្រវត្តិរបស់វាដែលមានស្រាប់ ឬអ្នកអាច​កំណត់​ទម្រង់​របស់វាតាមអ្វីដែលអ្នកចង់បាន​និងផែនទី offline ទៅតាម​ប្រភេទ​ព័ត៌មាន​ដែល​អ្នក​ចង់​ប្រមូល។ ជំហានចុងក្រោយនេះទាមទារចំណេះដឹងផ្នែកបច្ចេកទេស ដូច្នេះ អ្នកប្រហែលជា​ត្រូវការ​ជំនួយពី​អ្នកបច្ចេកទេស​ដើម្បី​កែប្រែ​ទម្រង់​របស់កម្មវិធី Mapeo។

2. ប្រមូលទិន្នន័យដោយប្រើកម្មវិធី Mapeo Mobile។ អាស្រ័យលើ​តម្រូវការ​និង​កិច្ចការ​របស់អ្នក ដំណាក់កាលនេះអ្នកអាចនឹងត្រូវធ្វើដំណើរទៅតំបន់ដាច់ស្រយាល ឬទៅ​ទីកន្លែង​ផ្សេងៗ​ក្បែរៗ​ភូមិរបស់អ្នក។ កម្មវិធី Mapeo Mobile អនុញ្ញាតិឲ្យអ្នក​កត់ត្រា​ទីតាំងផ្សេងៗ​តាមរយៈ​ GPS និង​បែងចែក​ទៅ​តាម​ប្រភេទខុសៗគ្នា បន្ទាប់មកភ្ជាប់កំណត់ត្រាឬរូបភាពទៅនឹងចំណុចនីមួយៗ និងពេលវេលាណាមួយ។ ឧទាហរណ៍ អ្នកអាចប្រមូលព័ត៌មានអំពីការប្រេងដែលកំពប់និងបង្ករផលប៉ះពាល់ដល់ដីរបស់អ្នក ថតរូបភាព​ទុកជាភ័ស្តុតាង និងកត់ត្រាអំពីពេលវេលាដែលប្រេងកំពប់។ ឬក៏ អ្នកអាចប្រើកម្មវិធី ម៉ាពីអូ ដើម្បីធ្វើផែនទីអំពីទីតាំងសំខាន់ៗនៅក្នុងទឹកដីរបស់អ្នក ដូចជា តំបន់​ប្រមាញ់សត្វ ចងក្រងជាឯកសារអំពីនរណាខ្លះបានទៅបរបាញ់នៅកន្លែងនោះ ហើយបាញ់បានសត្វអ្វីខ្លះ ឬតំបន់ណាដែលមាន​តម្លៃផ្នែកប្រវត្តិសាស្រ្តនិងជំនឿ។

3. Synchronize ទិន្នន័យរបស់អ្នក អ្នកអាចចែករំលែកទិន្នន័យជាមួយនឹងសមាជិកក្រុមរបស់អ្នក ដោយការប្រើទូរស័ព្ទដៃរបស់អ្នក ឬដោយភ្ជាប់​ទៅនឹងកម្មវិធី Mapeo Desktop ហើយបញ្ជូនទិន្ន័យរបស់អ្នកទៅទីនោះ។

4. កែសម្រួល ពិនិត្យរូបភាព និងវិភាគ។ ប្រើឧបករណ៍ Mapeo Desktop ដើម្បី​កែសម្រួល​និង​ពិនិត្យ​មើល​ទិន្នន័យដែលអ្នកប្រមូលបានដោយការប្រើកម្មវិធី Mapeo Mobile។ អ្នកអាចត្រងយកតែទិន្នន័យដែលអាចជួយអ្នកមើលឃើញរូបភាពអំពីអ្វីដែលកើតឡើង និង​វិភាគ​ព័ត៌មាន​ឲ្យត្រូវតាមនោះ។

5. បញ្ជូនទិន្នន័យរបស់អ្នកចេញៈ តាមរយៈឧបករណ៍ Mapeo Desktop អ្នកអាច​បង្កើត​របាយការណ៍ក្នុងទម្រង់ជា PDF ឬព្រីន ដើម្បីចែករំលែកជាមួយអ្នកផ្សេង។ អ្នកក៏​អាច​បង្កើត​សំណុំ​ឯកសារ (file) ហើយដាក់បញ្ចូលទិន្នន័យទៅក្នុងផែនទីនៅលើ web និងចែករំលែកតាម online។ អ្នកក៏អាចបញ្ជូនទិន្នន័យចេញ ក្នុងទម្រង់ជា GeoJSON CSV ឬ Shapefile ដើម្បី​យកទៅ​ប្រើ​ក្នុង​ប្រព័ន្ធទិន្នន័យ​ភូមិសាស្រ្តនិងឧបករណ៍វិភាគទិន្នន័យផ្សេងទៀត។ តាមរយៈកម្មវិធី Mapeo Mobile អ្នកអាចចែករំលែកទិន្នន័យ រូបភាពពាក់ព័ន្ធ និងកំណត់ហេតុ ជាមួយអ្នកផ្សេង តាមរយៈ អ៊ីម៉េល ឬ Whatsapp ក្នុងករណីចាំបាច់បន្ទាន់ ឬក្នុង​ករណី​ដែល​អ្នក​មិនអាច​ប្រើឧបករណ៍ Mapeo Desktop បាន។

របៀបចាប់ផ្តើម

របៀបងាយបំផុតក្នុងការចាប់ផ្តើមប្រើកម្មវិធី ម៉ាពីអូ ដើម្បីធ្វើផែនទី ឬដើម្បីឃ្លាំមើល គឺត្រូវ ទាញយកកម្មវិធី Mapeo Mobile ពី Google Play Store។ យើងសង្ឃឹមថា កម្មវិធីនេះងាយស្រួលប្រើ ក៏ប៉ុន្តែ នេះគឺជាសៀវភៅណែនាំសម្រាប់ជាជំនួយ ដើម្បី​បង្ហាញ​ផ្លូវអ្នក និង​របៀប​បំពេញ​កិច្ចការនេះ​ជាក្រុម។ បើសិនជាអ្នកចង់ប្រើវាជាមួយនឹងកម្មវិធី Mapeo Desktop ឬក៏ប្រើកម្មវិធី Desktop version ដើម្បីធ្វើផែនទី អ្នកអាច ទាញយកកម្មវិធីំ Mapeo Desktop ពីវិបសាយរបស់យើងបាន ហើយ​អាចរៀន​ពី​របៀប​ប្រើប្រាស់​វា​តាមរយៈ សេចក្តីណែនាំនេះ។ សេចក្តីណែនាំនេះ សូមសាកសួរសហគមន៍អ្នកប្រើប្រាស់របស់យើង។

ប្រសិនបើអ្នកចេះបច្ចេកទេសក្នុងការ​តម្លើងកម្មវិធី ម៉ាពីអូ ហើយចង់តម្លើងដោយខ្លួនឯង ដោយប្រើ​និមិត្តសញ្ញា​របស់អ្នក និងផែនទី​ offline អ្នកក៏អាច ស្វែងរក​ព័ត៌មាននៅទីនេះជាជំនួយ។

យើងចង់ឮអំពីគម្រោងការងាររបស់អ្នក ហើយសង្ឃឹមថាអ្នកនឹងរីករាយក្នុងប្រើកម្មវិធី ម៉ាពីអូ។ ចុះឈ្មោះក្នុងបញ្ជីឈ្មោះកម្មវិធី ម៉ាពីអូ របស់យើង ប្រសិនបើ​អ្នកចង់​ទទួល​បាន​ព័ត៌មាន​ថ្មីៗ​អំពី​ដំណឹង​និង​ការអភិវឌ្ឍ​ផ្សេងៗ។

ឧទាហរណ៍អំពីរបៀបប្រើប្រាស់កម្មវិធី ម៉ាពីអូ

ការឃ្លាំមើលបរិស្ថាននៅប្រទេសប៉េរូៈសហគមន៍ជនជាតិដើមបំពេញការងារឃ្លាំមើលតំបន់​អភិរក្ស ECA-Amarakaeri នៅប៉ែកអគ្នេយ៍នៃប្រទេសប៉េរូ ដោយប្រើប្រាស់កម្មវិធី Mapeo Mobile និង Desktop ជាផ្នែកមួយនៃសកម្មភាពគ្រប់គ្រងរួមគ្នានៅតំបន់អភិរក្ស។

ការផលិតផែនទីនៅប្រទេសកេនយ៉ាៈ ជនជាតិដើម អូហ្គីក (Ogiek) នៃតំបន់ ភ្នំអែលហ្កន (Mount Elgon) កំពុងតែប្រើកម្មវិធី Mapeo Mobile និង Desktop ដើម្បី​ធ្វើ​ផែនទី​ទីតាំង​សំខាន់ៗ​ នៅលើ​ដីធ្លី​របស់​ពួកគេ ដែលជា​ផ្នែកមួយ​នៃការ​ទាមទារដីប្រវត្តិសាស្រ្ត​របស់​ពួកគេ។

ការផលិតផែនទីទឹកដីដូនតានៅប្រទេសអេក្វាដ័រ ប្រជាជន សៀកូប៉ាអ៊ី (Siekopai) នៅប៉ែក​ខាងជើង​ប្រទេសអេក្វាដ័រ ប្រើប្រាស់កម្មវិធី Mapeo Desktop ដើម្បីស្វែងរក​រូបភាព​ផ្កាយរណប​​នៃទឹកដី​ដូនតា​ជាមួយនឹង​ព្រឹទ្ធាចារ្យ​នៅក្នុងភូមិ​របស់​ពួកគេ និងចងក្រង​សាច់រឿង​ទាក់ទង​នឹង​បឹងបួរនិងការតាំងទីលំនៅពីដំបូង។

ការគ្រប់គ្រងគ្រោះមហន្តរាយសម្រាប់ប្រជាជនងាយរងគ្រោះដោយបម្រែបម្រួលអាកាសធាតុ នៅប្រទេសថៃៈ អ្នកស្ម័គ្រចិត្ត​សុខាភិបាលភូមិ​នៅតំបន់ឆ្នេរសមុទ្រនៃប្រទេសថៃកំពុងតែ​ប្រើកម្មវិធី ម៉ាពីអូ ដើម្បី​ប្រមូល​ទិន្នន័យអំពីជនងាយរងគ្រោះ ដើម្បីធានាថា​ពួកគេបានទទួល​ជំនួយ​ភ្លាមៗនិងចំគោលដៅ ក្នុងករណី​មាន​គ្រោះ​មហន្តរាយ​ធម្មជាតិកើតឡើង។

លក្ខណៈពិសេស

តម្រូវការ Softwareៈ ឧបករណ៍ Mapeo Desktop អាចតម្លើងនៅលើកុំព្យូទ័រ PC, Mac និង Linux។ កម្មវិធី Mapeo Mobile បច្ចុប្បន្នអាចដំណើរការនៅលើប្រព័ន្ធ Android។

សុវត្ថិភាពៈ ទិន្នន័យដែលប្រមូលបានតាមរយៈកម្មវិធី Mapeo Mobile គឺមិនអាចក្លែងបន្លំ និង​ត្រូវបាន​ចងកូដ​ដើម្បី​ធានាថា​គ្មាននរណាប៉ះពាល់បាន។ រាល់ទិន្ន័យទាំងអស់ មិនថាវាត្រូវបានបង្កើតនៅលើឧបករណ៍ Mapeo Desktop ឬ Mapeo Mobile នោះទេ ត្រូវបានចាក់សោរដែលត្រូវបានផ្ទៀងផ្ទាត់ដើម្បីភាពត្រឹមត្រូវរបស់វា។ គម្រោងឯកជនទាំងអស់អាចប្រើសោរសុវត្ថិភាព ដែល​កំណត់ថា​នរណា​អាច​មើល​និង​ទទួល​បាន​ទិន្នន័យនោះ។

លក្ខណៈពិសេសសំខាន់ៗៈ បំពេញមុខងារបានទាំងស្រុងដោយមិនត្រូវការ អ៊ីនធឺនែត។ ទិន្នន័យមិនត្រូវបានផ្ទុកក្នុងប្រព័ន្ធមេ ​(Decentralized data storage)។ កំណត់ផែនទីនិងរៀបចំទិន្នន័យដោយខ្លួនឯង (Custom maps and configurations)។ អាចធ្វើបច្ចុប្បន្នភាពទិន្នន័យពីសមាជិកក្រុមពីម្នាក់ទៅម្នាក់ (Peer-to-peer synchronization)។

ភាសាៈ អាចបកប្រែទៅជាភាសាផ្សេងៗបាន។ បច្ចុប្បន្នកម្មវិធី ម៉ាពីអូ មានជាភាសាភូមា ហុល្លង់ អង់គ្លេស បារាំង អាល្លឺម៉ង់ ហ៊ីនឌី ឥណ្ឌូនេស៊ី ខ្មែរ ម៉ាឡេ ណេប៉ាល់ ព័រទុយហ្គាល់ អេស៉្បាញ ស្វាហ៊ីលី ថៃ និងវៀតណាម។

សម្រាប់ការផ្សព្វផ្សាយ (Media): អាចបន្ថែមរូបភាពបាន។

ជម្រើសនៃការនាំចូល (Import): អាចនាំចូលទិន្នន័យទីតាំងដែលថតដោយម៉ាស៊ីន GPS និង shapefile ទៅកម្មវិធី Mapeo Desktop បាន។

ជម្រើសនៃការបញ្ជូនចេញ (Export): កម្មវិធី Mapeo Desktop: អាចផ្ញើចេញ​ជាទម្រង់ PDF ឬរបាយការណ៍ព្រីន ជាទម្រង់ GeoJSON ឬ CSV ឬជាទម្រង់ Shapefile។ កម្មវិធី Mapeo Mobile: អាចបញ្ជូនចំណុចតែមួយចេញទៅអ៊ីម៉េល ឬ Whatsapp និងកម្មវិធី ចែករំលែក​ផ្សេងទៀតក្នុងទូរស័ព្ទដៃ។

Digital Democracy សូមថ្លែង​អំណរគុណ​សហគមន៍​ជនជាតិដើម​ទាំងអស់​ដែល​បាន​ចូលរួម​ចំណែក​ក្នុងការ​​បង្កើតកម្មវិធី Mapeo Mobile និង Desktop។